∙ “É intolerable que a incompetencia do goberno municipal en xeral, e da concelleira de Facenda en particular, provoque un novo atraso no pago das facturas pendentes”, denuncian os populares.
∙ O goberno de Rioboo segue sen proporcionar toda a información solicitada polo Grupo Popular sobre as facturas impagadas.
A Comisión de Presidencia Extraordinaria que o Partido Popular solicitou hai un mes para dar solución canto antes á falta de pagamento de facturas por parte do Concello, celebrouse finalmente esta mañá “10 días máis tarde do prazo máximo que establece o propio regulamento interno do Concello”, declara a líder popular, Izaskun García.
Na comisión, á que non asistiu José Ramón Rioboo, “non se puido ditaminar o punto do día porque este goberno segue sen poñer ao dispor toda a documentación que levamos pedindo desde xaneiro. Seguimos sen coñecer con claridade a que gastos pertencen algunhas facturas e que facturas do 2023 non están incluídas neste procedemento. No PP non queremos facturas esquecidas nun caixón”, asegura a portavoz popular.
Os populares esixiron que o modificativo vincúlese ás facturas pendentes de pago mediante un recoñecemento extraxudicial de crédito para a súa aprobación nun único pleno, “o que axilizará os tempos no pago das facturas, e non en dous plenos como pretendía a concelleira de Facenda, Marta Iglesias”, sinala García Gorostizu.
Unha práctica, a do recoñecemento extraxudicial de crédito, que “pon de manifesto o descontrol orzamentario que existe neste Concello, sen orzamentos para este 2024, sen planificación do gasto. Unha práctica á que non teriamos que recorrer de ter unha concelleira de Facenda e un alcalde á altura que realizasen o seu traballo conforme á lei e no interese dos veciños”, afirman desde o Grupo Popular.
“Estamos á espera dunha nova convocatoria da comisión, que esiximos sexa inmediata, e dar solución dunha vez por todas a unha situación provocada e mantida no tempo por un goberno incapaz, incompetente e neglixente ao que pouco ou nada lle importa que empresas e asociacións leven, nalgúns casos, máis dun ano de atraso no pago das súas facturas”, sentenza García.
